Өфөлә «Дим-2» станцияһы эшселәре геморрагик биҙгәк менән зарарланған

ӨФӨ, 2017 йыл, 7 март. /«Башинформ» мәғлүмәт агентлығы, Эльмира Сабирова/. Өфөлә «Дим-2» станцияһы эшселәре геморрагик биҙгәк вирусы менән зарарланған. Нисә кешенең зарарланғанлығы әлегә билдәһеҙ. «Башинформ» агентлығына 4-се йоғошло ауырыуҙар клиник дауаханаһындағы үҙенең сығанағы хәбәр итеүенсә, бөгөнгә дауалау учреждениеһында 41 кеше дауалана һәм тикшереү үтә. Ләкин улар араһында тимер юл станцияһы эшселәре генә түгел, йәғни пациенттар төрлө урындарҙан дауаханаға эләккән.

«Роспотребнадзор»ҙың Башҡортостан идаралығы мәғлүмәттәре буйынса, республикала сирҙең күтәрелеше теркәлмәгән. Ошо хәл килеп тыуған ойошмала үҙенең медицина хеҙмәте эшләй, әлеге ваҡытта был хәлде тикшерә, тип өҫтәнеләр ведомствола.

Рәсәй тимер юлдары компанияһы «Башинформ» агентлығына бер ниндәй ҙә аңлатма бирмәне.

«Дим-2» станцияһы эшселәренең Башҡортостан юлдаш телеканалына биргән интервьюһында һөйләүҙәренсә, етәкселек сысҡандарҙың булыуына һәм тимер юлсыларҙың һорауына ҡарамаҫтан, вагон депоһында кимереүселәрҙен химик эшкәртеү үткәрмәгән. Улар ошо проблема хаҡында администрацияға уҙған йылдың көҙөндә үк еткергән булған. Әммә бер кем дә бер ниндәй ҙә сара күрмәгән.