Башҡортостан һәм Өфө яңылыҡтары
92.59
+0.02
100.27
-0.14
85.78
+0.37
1+ °C
Ҡар
Бөтә яңылыҡтар
Йәмғиәт
3 Март 2017, 08:17

Башҡортостан юлдаш телевидениеһы журналистары үҙ урындарын «Тамыр» балалар телеканалынан йәш хеҙмәттәштәренә бирҙе

Башҡортостан юлдаш телевидениеһы эфирынан скриншот
Башҡортостан юлдаш телевидениеһы эфирынан скриншот
ӨФӨ, 2017 йыл, 3 март. /«Башинформ» мәғлүмәт агентлығы, Гөлфиә Акулова/. 2 мартта Өфөлә Башҡортостан юлдаш телевидениеһы журналистары «Тамыр» балалар телеканалынан йәш хеҙмәттәштәре менән бер көнгә ролдәр менән алмашынды. Был акция «Тамыр» балалар-үҫмерҙәр телеканалының 25 йыллығына арналды.
Башҡортостан юлдаш телевидениеһының бөтә тапшырыуҙарында ла тиерлек алып барыусылар сифатында алты йәштән 14-кәсә телестудия тәрбиәләнеүселәре сығыш яһаны. «Сәләм», «Бәхетнамә», «Бәхетле сәғәт», «Интервью» һәм хатта «Телеүҙәк» программаһын «Тамыр»ҙың «Тау-тау хәбәр», «Сәңгелдәк», «Был беҙ!», «Сулпылар», «Физра» проекттарының йәш таланттары алып барҙы.
12 йәшлек Айгиз Хәсәнов Башҡортостан юлдаш телевидениеһы тамашасыларын төбәк яңылыҡтары менән таныштырыу бурысын бик уңышлы башҡарҙы. Үҙ сиратында, алып барыусылар Евгений Романов, Таһир Вәхитов, Гүзәл Әхмәтйәрованы «Тау-тау хәбәр» балалар тапшырыуын ҡараусылар күрә алды. Башҡорт телендә «Интервью» тапшырыуын «Тамыр»ҙың тәжрибәле йәш журналисы Наҙгөл Шәрәфетдинова алып барҙы. Ул һорауҙарын «Төньяҡ амурҙары» патриотик клубы етәксеһе урынбаҫары Юлай Ғәйнуллинға бирҙе. «Телеүҙәк»тә 10 йәшлек Александр Абрашин Башҡортостан Республикаһы Дәүләт Йыйылышы депутаты Эльвира Айытҡолова менән әңгәмә ҡорҙо. Башҡорт телендәге «Телеүҙәк»тә тура эфирҙа 13 йәшлек Азамат Ҡарабулатов эшләне. Башҡортостан юлдаш телевидениеһы алып барыусыһы Зөһрә Рәхмәтуллинаның әйтеүе буйынса, йәш телевидение йондоҙҙары ҙур студияла үҙҙәрен иркен тота, һөнәргә ихлас ҡыҙыҡһыныу менән ҡарай һәм өлкән хеҙмәттәштәренә лайыҡлы алмаш булып үҫә.
Башҡортостан юлдаш телевидениеһында Балалар көнө дауамында студияның хәҙер инде өлкәнәйгән тәүге алып барыусы балалары менән «Тамырҙа эшләнгән» проектын, «Шүлгәнташ» әкиәт фильмын һәм бөтә Рәсәй һәм халыҡ-ара конкурстарҙа призлы урындар яулаған тапшырыуҙар күрһәтелде.
Шулай уҡ үҙҙәренең юбилейы хөрмәтенә «Тамыр»ҙар «Родина» кинотеатрында сәләмәтлек мөмкинлектәре сикләнгән балалар өсөн фильм күрһәтте. Байрам көнө «Өфө уттары» күңел асыу комплексында мәктәп дискотекаһы менән тамамланды.
Автор:Гөлфиә Акулова
Читайте нас: