Башҡорт дәүләт медицина университеты командаһы Ҡырғыҙстанда Халыҡ-ара олимпиадала беренсе урын яуланы

ӨФӨ, 2016 йыл, 22 февраль. /«Башинформ» мәғлүмәт агентлығы, Ләйлә Аралбаева/. Башҡорт дәүләт медицина университетының студенттар командаһы Бешкәктә микробиология, вирусология һәм иммунология буйынса I Халыҡ-ара олимпиадала беренсе урын яуланы. Олимпиада И.К. Ахунбаев исемендәге Ҡырғыҙ дәүләт медицина академияһында уҙҙы һәм был уҡыу йортона нигеҙ һалыусы профессор Б.Я. Эльбертҡа арналды.

Олимпиадала Рәсәйҙең, Ҡаҙағстандың һәм Ҡырғыҙстандың туғыҙ юғары уҡыу йортонан 12 команда ҡатнашты. Рәсәйҙән профессор, медицина фәндәре докторы Марсель Тойғонов һәм доцент, медицина фәндәре кандидаты Лилиә Рафиҡова етәкселегендә Башҡорт дәүләт медицина университетының «Micros» командаһы сығыш яһаны.

БДМУ студенттары теоретик һәм практик эштәрҙә (микроскоп һәм туҡландырыу мөхиттәре менән эшләүҙә) юғары һөҙөмтә күрһәтте. Ҡырғыҙ дәүләт медицина академияһы ректоры, профессор, медицина фәндәре докторы И.О. Кудайбергенова еңеүселәргә кубоктар һәм грамоталар, шулай уҡ олимпиадала ҡатнашыусы уҡыу йорттарының етәкселәренә рәхмәт хаттары тапшырҙы. Халыҡ-ара олимпиадала ҡатнашыусылар, төбәк уҡытыу йорттарында белем биреү кимәлен асыҡларға һәм вуздар араһында дуҫлыҡ мөнәсәбәттәрен көйләүгә булышлыҡ иткән оҡшаш сараларҙы уҙғарырға кәрәк, тип билдәләне.

«Иртәгәһенә Бешкәк ҡалаһы буйлап экскурсия ойошторолдо: «Ала-Арча» Ҡырғыҙ дәүләт тәбиғәт паркында һәм Гюнтер фон Хаггенс нигеҙ һалған Ҡырғыҙ дәүләт медицина академияһының пластинацияһы музейында булдыҡ. Кискеһен С. Айытматов исемендәге Рус драма театрына барҙыҡ. Ҡырғыҙстанға сәфәребеҙ бик бай һәм иҫтә ҡалырлыҡ булды, — тип һөйләне БДМУ командаһы ҡатнашыусылары. — Ошондай сараларҙа ҡатнашыу мөмкинлеге биргән Башҡорт дәүләт медицина университеты ректоры, Рәсәй фәндәр академияһы ағза-корреспонденты, профессор, медицина фәндәре докторы В.Н. Павловҡа һәм яҡшы белем, әҙерлек өсөн микробиология һәм вирусология кафедраһы коллективына ҙур рәхмәтебеҙҙе белдеребеҙ».