Республикабыҙҙан бер ҡатын интернетта ишетмәгән ҡулланыусылар араһында иң популяр блогерҙарҙың береһе булды

ӨФӨ, 2017 йыл, 17 февраль. /«Башинформ» мәғлүмәт агентлығы, Гөлфиә Акулова/. Дүртөйлө районының Түбәнге Аташ ауылынан Любовь Сәйетова интернетта ишетмәгән ҡулланыусылар араһында иң популяр блогерҙарҙың береһе булды. Һаңғырауҙар өсөн YouTube-та һәм социаль селтәр сәхифәһендә үҙ каналын алып барған 55 йәшлек ҡатын тураһында сюжетты «Башҡортостан» дәүләт телерадиокомпанияһы күрһәтте.

Блог авторы ишетеү буйынса инвалидтар өсөн һуңғы хәбәрҙәрҙе һөйләй, ҡул хәрәкәте телендә видеороликтар һәм фильмдар төшөрә, был шау-шыулы донъяла ишетмәгәндәргә нисек йәшәргә кәңәштәр бирә. Уның проектында көләмәстәр, кәңәштәр, мажаралар һәм ҡыҙыҡлы ваҡиғалар бар. Видеоблогты ҡатын файҙалы ғына түгел, ҡыҙыҡлы итергә лә тырыша. Уның яҙылыусыларының иҫәбе Рәсәйҙә генә сикләнеп ҡалмай, сит илдәрҙә лә үҫә. Мәҫәлән: Любовь Сәйетова әкиәттәрҙе балалары менән бергә төшөрә. Сәйетовтар ғаиләһе ишетеү һәләте боҙолған һигеҙ баланы ҡарауға алған.