Илебеҙҙең иң уҡыусан ун төбәге исемлегендә Башҡортостан да бар

ӨФӨ, 2017 йыл, 17 февраль. /«Башинформ» мәғлүмәт агентлығы, Ольга Мортазина/. Башҡортостан илебеҙҙең иң уҡыусан ун төбәге исемлегенә инде. Матбуғат баҫмаһын таратыусылар ассоциацияһы һуңғы яҙылыу кампанияһы йомғаҡтары буйынса иң яҡшы һөҙөмтә күрһәткән баҫмаларҙы һәм Рәсәй почтаһының төбәк филиалдарын бүләкләне. Быйыл яҙылыу кампанияһын баһалағанда лидерҙар иҫәп күрһәткесе буйынса түгел, ә төбәктә һәр мең кешегә яҙылыу тиражының тығыҙлығы буйынса билдәләнде. Бындай алым халыҡты йәлеп итеү тәрәнлеген иҫәпкә ала, тип аңлатма бирҙеләр Рәсәй почтаһының Башҡортостан филиалында.

2017 йылдың тәүге ярты йыллығына Курск өлкәһе (мең кешегә 340 яҙылыу күрһәткесе менән), Төньяҡ Осетия (Алания) (320), Чечня (288), Татарстан (265), Башҡортостан (256), Алтай (242), Сыуашстан (236), Брянск өлкәһе (234), Тыва (227), Кострома өлкәһе (216) яҙылыу компанияһы лидерҙары булды.

Алдағы кампания менән сағыштырғанда тираждарҙың бер аҙ кәмеүенә ҡарамаҫтан (Башҡортостанда – биш процент самаһы), яҙылыу сифаты артҡан, тип билдәләнеләр Федераль почта элемтәһенең Башҡортостан идаралығында. Ул каталогта хаҡы ике һумдан кәм булған баҫмаларҙың һанын кәметеү, шулай уҡ нәшер итеүселәргә һәм яҙылыусыларға социаль ярҙам күрһәтеү буйынса ҡабул ителгән киңерәк программа ярҙамында килеп сыҡты.