Абҙаҡ тау саңғыһы курорты — рәсәйҙәрҙең ҡышҡы ял урындары араһында лидер

ӨФӨ, 2017 йыл, 16 февраль. /«Башинформ» мәғлүмәт агентлығы, Гөлфиә Акулова/. Белорет районында урынлашҡан Абҙаҡ тау саңғыһы курорты февралдәге байрам көндәрендә ҡышҡы ял лидерҙары иҫәбенә инде. RoomGuru.ru отелдәр эҙләү сервисы илдең иң популяр тау саңғыһы курорттарын билдәләне. Рейтинг 23-26 февралдә йәшәү өсөн отелдәр бронләү мәғлүмәттәре буйынса төҙөлгән.

Абҙаҡ Ватанды һаҡлаусылар көнөндә курорттарҙа ял итеүҙең популярлығы буйынса туғыҙынсы урынды биләй. Красная Поляна (Сочи), Домбай (Ҡарасәй-Черкес), Приэльбрусье (Терскол, Ҡабарҙа-Балҡар), Шерегеш (Кемеров өлкәһе), Гора Соболиная (Байкальск, Иркутск өлкәһе), Солнечная долина (Мейәс, Силәбе өлкәһе), Белокуриха (Алтай крайы), Большой Вудъявр (Кировск, Мурманск өлкәһе) һәм Мәскәү өлкәһе курорттары февралдәге байрам көндәрендә Рәсәйҙең сәйәхәт итеү өсөн популяр 10 тау саңғыһы курорты иҫәбенә инә.

ТурСтат агентлығы мәғлүмәттәре буйынса, Абҙаҡ ҡышын илдә иң популяр ял итеү урындарының береһе булды.