Башҡортостандан табип-инфекционист Гватемалала фәҡирҙәр өсөн клиниканы асыуға әҙерләй

ӨФӨ, 2017 йыл, 15 февраль. /«Башинформ» мәғлүмәт агентлығы, Гөлфиә Акулова/. 24 февралдә Гватемаланың бәләкәй генә Чуинахтахуюб ауылында фәҡирҙәр өсөн медицина клиникаһы асыла. «Донъя сигендә клиника төҙөйбөҙ» проектын былтыр Башҡортостандан табип-инфекционист Виктория Валикова күтәреп сыға. Доктор был урында эшләүсе берҙән-бер белгес була. Фәҡирлек һәм ҡалаларҙан алыҫта ятҡан ауылдарҙа медицина ярҙамының булмауы уны клиника төҙөү өсөн төрлө илдәрҙән кешеләрҙе берләштереү идеяһына этәрә.

Дауахана төҙөүгә, ҡорамалдар, дарыуҙар һәм тотона торған материалдар һатып алыуға 3,5 миллион һумлап аҡса талап ителгән. Краудфандинг платформаһында һәм he-he.org сайты аша аҡса йыйыу ойошторолған. Йыйылған аҡса ярҙамында ете ай эсендә дауахана төҙөлгән. Ул ауыл мәктәбе эргәһендә урынлашҡан. Виктория Валикованың әйтеүе буйынса, яңы амбулатория бинаһында консультация, хирургия һәм бала табыу бүлмәләре, аптека, лаборатория һәм өс урынлы палата бар. Урындағы халыҡҡа даими медицина ярҙамы күрһәтеү өсөн ирекмән-медиктар йыйыу алып барыла. Клиникала ауырыуҙар тәүлек әйләнәһенә ҡабул ителәсәк.