Өфөлә «Йәш профессионалдар» төбәк чемпионаты старт ала

ӨФӨ, 2017 йыл, 13 февраль. /«Башинформ» мәғлүмәт агентлығы, Эльмира Сабирова/. 13-17 февралдә Өфөлә II «Йәш профессионалдар» (WorldSkillsRussia) төбәк чемпионаты уҙғарыла. Уны асыу тантанаһы Өфө дәүләт нефть техник университетының һигеҙенсе корпусында бөгөн киске 5-се яртыла башлана.

200-ҙән ашыу конкурсант республиканың хеҙмәт баҙарында ҙур һорау менән файҙаланған һөнәрҙәр: «Иретеп йәбештереү технологиялары», «Еңел автомобилдәрҙе ремонтлау һәм хеҙмәтләндереү», «Матбуғатта баҫма технолоиялары», «Таш юныу эше» буйынса оҫталығын күрһәтә.

Бәйгелә 16- 22 йәштәге һөнәри белем биреү ойошмалары студенттары ҡатнаша.

Чемпионат барышында тәүге тапҡыр JuniorSkills компетенциялары буйынса ярыштар ойошторола. Унда 10-14 йәшкә тиклемге һәм өлкәнерәк уҡыусылар ҡатнаша ала.

Еңеүселәрҙең исемдәре 17 февралдә чемпионатты ябыу тантанаһында иғлан ителә. Иң яҡшылары май айында Краснодарҙа V «Йәш профессионалдар» милли чемпионаты финалында ҡатнашыу хоҡуғын алыу өсөн илдең төрлө төбәктәрендә һайлап алыу ярыштарында Башҡортостан исеменән сығыш яһай.

Конкурсанттарҙы төбәктең төп эксперттары (30 кеше) һәм WSR һәм JS милли эксперттары баһалай.

Уҙған йыл йомғаҡтары буйынса Сибай күп профилле һөнәри колледж студенты Рафаэль Яхин милли йыйылма составына тәҡдим ителде. Ул «Таш юныу эше» компетенцияһы буйынса «Йәш профессионалдар» милли чемпионаты финалында ҡатнашып, иң күп балл йыйҙы. Былтыр декабрь башында EuroSkills 2016 һөнәри оҫталыҡ буйынса Европа чемпионатында Рафаэль илдең йыйылма командаһына 473 балл килтерҙе. Ул саҡта Рәсәй йыйылмаһы беренсе урын яуланы. Әлеге ваҡытта ул киләһе йылда 14-19 октябрҙә Берләшкән Ғәрәп Әмирлектәренең баш ҡалаһы Абу-Дабиҙа үтәсәк WorldSkills Competition-2017 донъя чемпионатына әҙерләнә.

Рәсәйҙең милли йыйылма командаһы 60-тан ашыу илдең эшсе һөнәр вәкилдәре менән осрашасаҡ, һәм Европа, Азия, Африка, АҠШ, Латин Америкаһы һәм Яҡын Көнсығыштың танылған оҫталары менән миҙалдар өсөн көс һынашасаҡ.