Төбәктә һунар хужалығын алып барыусыларҙы «Һунар һәм балыҡ тотоу» фотокүргәҙмәһендә ҡатнашырға саҡыралар

ӨФӨ, 2017 йыл, 7 февраль. /«Башинформ» мәғлүмәт агентлығы, Гөлфиә Акулова/. Башҡортостанда һунар хужалығын алып барыусыларҙы, эшмәкәрлектәре аусылыҡ туриндустрияһын үҫтереү менән бәйле булған бәләкәй һәм урта эшҡыуарлыҡ вәкилдәрен, шулай уҡ профессиональ фотографтарҙы һәм фотоһәүәҫкәрҙәрҙе «Һунар һәм балыҡ тотоу» фотокүргәҙмәһендә ҡатнашырға саҡыралар. Ойоштороусыһы — төбәктең Тәбиғәттән файҙаланыу һәм экология министрлығы.

«Беҙ йәмәғәтселектә һунар хужалығын алып барыусыларҙың эшмәкәрлеге хаҡында дөрөҫ ҡараш булдырырға ниәтләйбеҙ, — тип аңлатма бирҙе тәбиғәттән файҙаланыу һәм экология министры урынбаҫары Илдус Яхин. — Һунар хужалыҡтарының эшмәкәрлеге тәү сиратта йәнлектәр донъяһы иҫәбен, популяцияһын арттырыуға, уларға йәшәү өсөн уңайлы шарттар тыуҙырыуға йүнәлтелгән».

«Һунар һәм балыҡ тотоу» фотокүргәҙмәһе быйыл апрелдә Башҡортостан Милли музейында уҙа. Уның маҡсаты — республиканың төрлө мөйөштәрендә төшөрөлгән иң яҡшы фотоһүрәттәрҙе күрһәтеү.

Күргәҙмәлә ҡатнашыу өсөн фотоматериалдарҙы 31 мартҡа тиклем [email protected] электрон адресына ебәрергә йәки түбәндәге адрес буйынса килтерергә мөмкин: 450017, Өфө ҡалаһы, Ленин урамы, 86, 313-сө һәм 311-се бүлмәләр.