Өфөлә макулатура тапшырған өсөн музейға саҡырыу ҡағыҙы алырға мөмкин

ӨФӨ, 2017 йыл, 3 февраль. /«Башинформ» мәғлүмәт агентлығы, Эльмира Сабирова/. Өфөлә республика Хәрби Дан музейы макулатура йыйыу буйынса «Ағастарҙы бергәләп һаҡлайыҡ!» акцияһын ойоштора. Унда һәр теләүсе ҡатнаша ала. Журналдар, гәзиттәр, офис ҡағыҙҙары, дәфтәрҙәр, шулай уҡ әҙәби ҡиммәте булмаған китаптар икенсел эшкәртелеүгә бара.

50 килограмға тиклем макулатура килтергән ҡала халҡы – бер музейға, 50-нән 200 килограмға тиклем килтергәндәр ике музейға (республика Хәрби Дан һәм 112-се Башҡорт кавалерия дивизияһы музейҙарына) саҡырыу ҡағыҙы аласаҡ, ә 200 килограмдан артығыраҡ тапшырғандар өсөн йыл дауамында музейҙың яңы экспозицияларын ҡарау мөмкинлеге бирелә, тип хәбәр иттеләр Орджоникидзе районы хакимиәтенең мәғлүмәт-аналитика бүлегендә. 200 килограмдан күберәк ҡағыҙ тапшырған мәктәп уҡыусылары ойошторолған төркөм менән ике музейға йөрөүгә 50 процент ташлама ала.

Макулатураны ҡабул итеү пункттары дүшәмбенән шәмбегә ҡәҙәр иртәнге сәғәт 9-ҙан киске алтынсы яртыға тиклем Комаров урамы, 7 һәм Левитан урамы, 27 адрестары буйынса эшләй. Тулыраҡ мәғлүмәт – 260-44-64 телефоны буйынса.