7 февралдә ата-әсәләр Берҙәм дәүләт имтиханы буйынса һынау тота – киң мәғлүмәт саралары

ӨФӨ, 2017 йыл, 1 февраль. /«Башинформ» мәғлүмәт агентлығы, Ғәлиә Нәбиева/. 7 февралдә Мәғариф һәм фән өлкәһендә күҙәтеү буйынса федераль хеҙмәт ата-әсәләр өсөн 50 төбәктә Берҙәм дәүләт имтиханы буйынса һынау имтихандары ойоштора. Ул «Ата-әсәләрҙең Берҙәм дәүләт имтиханын тапшырыу көнө» бөтә Рәсәй акцияһы барышында уҙа, тип хәбәр итә «ТАСС» агентлығы. Акция сығарылыш уҡыусыларының ата-әсәләренә имтихан процедураларының үҙенсәлектәре хаҡында мәғлүмәт еткереүгә арналған.

«Ата-әсәләр үҙҙәре бөтә имтихан процедураларын үтә: теркәлә, бланктар тултыра, дәүләт имтиханында нисек контроль алып барылғанын, имтихан материалдары нисек баҫылғанын һәм эшкәртелгәнен күрә, Берҙәм дәүләт имтиханында булған темаларға оҡшаш эштәрҙән торған ҙур булмаған имтихан эшен яҙа аласаҡ»,— тип хәбәр итә Мәғариф һәм фән өлкәһендә күҙәтеү буйынса федераль хеҙмәттең матбуғат хеҙмәте.

7 февралдә акцияла 50-ләгән төбәк ҡатнаша, ҡалғандарында ошондай уҡ саралар ай дауамында уҙасаҡ. Уларҙа төбәк власы, мәғариф министрлығы вәкилдәре шәхсән ҡатнашасаҡ, 2017 йылда Берҙәм дәүләт имтиханының нисек уҙыуын һөйләйәсәк.