Райондарҙа парашют спорты үҫешә

ӨФӨ, 2017 йыл, 31 ғинуар. /«Башинформ» мәғлүмәт агентлығы, Әлим Фәйезов/. Башҡортостан райондарында парашют спорты үҫешә. Хәйбулла районында был спорт төрө район етәкселеге ярҙамында ойошторола. Илһөйәрлек тәрбиәләү һәм йәштәрҙе әрме хеҙмәтенә әҙерләү өсөн был ойошма нигеҙендә уҡытыу-спорт үҙәге асыу бурысы ҡуйыла. Үҙәк Йәнтеш ауылындағы мәктәптә нигеҙләнә, тип хәбәр иттеләр район хакимиәтендә.

Шул проект сиктәрендә Йәнтештә яңыраҡ парашют-десант әҙерлек синыфы менән таныштырыу уҙҙы. Унда район учреждениелары етәкселәре, хакимиәт вәкилдәре, мәктәп директорҙары, десант ғәскәрҙәре ветерандары ҡатнашты.

Ул йәштәргә Ҡораллы Көстәрҙә хеҙмәт итеүгә әҙерләнергә, уларҙың хәрби рухын нығытырға, тарихты өйрәнергә мөмкинлек бирәсәк, тине район хакимиәте башлығы Рәил Ибраһимов, ойошторолған секцияның әһәмиәтен билдәләп.

«Парашют секцияһына бөтә теләүселәрҙе йыйырға ниәтләнәбеҙ, — тип һөйләне парашют мәктәбен ойоштороусыларҙың береһе, Башҡортостан ДОСААФ-ының төбәк авиация бүлегенең әйҙәүсе белгесе Олег Комянин. — Һауа-десант әҙерлек дәрестәрен уҡытасаҡбыҙ. Маҡсатыбыҙ – кешеләргә парашют менән һикереү түгел, тап һауа-десант әҙерлеге буйынса кәрәкле белем биреү. Дәрестәр синыфта һәм Йәнтеш ауылы үҙәгендә, һауа-десант комплексының йәҙрә элементтарында уҙғарыласаҡ. Тыңлаусылар парашют-десант системаһының ҡоролошо һәм уны йыйыу алымы менән танышасаҡ. Уҡыу курсын тамамлағандан һуң, улар имтихан тапшырасаҡ, уның һөҙөмтәһе буйынса үҙаллы һикереүҙәргә рөхсәт аласаҡ. Февралдә тәүге дәрестәрҙе үткәреү күҙаллана. 30-лаған егет курсанттар исемлегенә яҙылған да инде».