Башҡортостанда медицина реабилитацияһының яңы бүлексәләрен асырға ниәтләйҙәр

ӨФӨ, 2017 йыл, 27 ғинуар. /«Башинформ» мәғлүмәт агентлығы, Эльмира Сабирова/. 2017 йылда Башҡортостанда кардиология, неврология, травматология һәм ортопедия йүнәлештәре буйынса медицина реабилитацияһының яңы бүлексәләрен асыу күҙаллана.

Төбәктең Һаулыҡ һаҡлау министрлығында билдәләүҙәренсә, медицина реабилитацияһының яңы системаһын ғәмәлгә ашырыу дауалау ваҡытын, өҙлөгөүҙәрҙе, үлем осраҡтарын кәметәсәк, пациенттарҙың йәшәү сифатын яҡшыртасаҡ. Система медицина реабилитацияһы процесына индерелгән пациенттарҙы теркәү системаһының йүнәлеш буйынса махсуслашҡан өс этаплы медицина ярҙамын күрһәтеүҙе ойоштороуҙы күҙ уңында тота. Бынан тыш, ул реабилитациялауҙың бер этабынан икенсеһенә күсереүҙең фәнни нигеҙле күрһәткестәрен әҙерләргә, шулай уҡ реабилитация үҙәктәренең эш сифатын баһалау өсөн ғилми нигеҙ булдырырға ярҙам итәсәк.

Белем биреү саралары барышында табиптарҙы, дауалау физкультураһы инструкторҙарын һәм методистарын, шәфҡәт туташтарын, логопедтарҙы, психологтарҙы уҡытыу ҡаралған.