Төбәктә өс күл тауар балыҡсылығы өсөн тапшырылды

ӨФӨ, 2017 йыл, 25 ғинуар. /«Башинформ» мәғлүмәт агентлығы, Гөлфиә Акулова/. Башҡортостан биләмәһендәге өс күл 25 йылға балыҡсылыҡ өсөн файҙаланыуға тапшырылды, тип хәбәр иттеләр төбәктең Тәбиғәттән файҙаланыу һәм экология министрлығында. Өфөнөң Калинин районында — Синьгирево күле, Ҡырмыҫҡалы районында — Ҙур һәм Бәләкәй Ҡаракүл. Һамарҙа Балыҡсылыҡ буйынса федераль агентлыҡтың Урта Волга территориаль идаралығында ҡиммәтле балыҡ үрсетеү хужалыҡтарын ойоштороу маҡсатында ҡулланыусыларға балыҡсылыҡ участкаларын беркетеү буйынса аукцион булды.

«Бынан һуң ошо күлдәргә балыҡ тотоу ҡағиҙәләре ҡағылмай, — тине Башҡортостан Тәбиғәттән файҙаланыу һәм экология министрлығының йәнлектәр донъяһы объекттарын һаҡлау бүлеге белгесе Рәлим Хажиев. — Ҡулланыусы ла халыҡтың һыу ятҡылыҡтарына килеүен сикләргә, һәүәҫкәр балыҡ тотоуҙы тыйырға хоҡуҡлы».

Әлеге ваҡытта республиканың балыҡсылыҡ хужалыҡтарында үҫтерелгән балыҡ күләме халыҡтың ихтыяжын ҡәнәғәтләндермәй. Был күрһәткес йылына 1500 тонна тәшкил итә. Белгестәр билдәләүенсә, был өлкәлә төбәктең ҡеүәте ғәйәт ҙур. Дөйөм алғанда, быйыл 30-ға яҡын һыу объекттарын балыҡсылыҡ өсөн бүлеп биреү ҡарала.