Республикала күлдә балыҡтарҙы һәләк булыуҙан ҡотҡаралар

ӨФӨ, 2017 йыл, 25 ғинуар. /«Башинформ» мәғлүмәт агентлығы, Гөлфиә Акулова/. Башҡортостандың Бөрө районындағы Шәмсетдин күлендә балыҡтарҙың һәләк булыуына юл ҡуймау өсөн саралар уҙғарыла, тип хәбәр итә республиканың Тәбиғәттән файҙаланыу һәм экология министрлығы. Һыу объектының периметры буйынса ҡырҡҡа яҡын мәке уйылған, күлгә һауа ебәреүҙе тәьмин итеү өсөн компрессор ҡуйылған.

Белгестәр аңлатыуынса, ҡағиҙә булараҡ, балыҡтарҙың һәләк булыуы ҙур булмаған, һай күлдәрҙә күҙәтелә. Ылымыҡтарҙың сереүе һөҙөмтәһендә һыуҙа кислород кәмей һәм ағыулы газдар бүленеп сыға, был иһә балыҡтарҙың үлеменә килтерә. Уларҙы мәке уйыу юлы менән ҡотҡарып ҡалырға мөмкин. Экологтар республика халҡын һыу объекттарына иғтибар итергә, һәм хәүефле күренештәр күҙәтелгән осраҡта төбәктең тәбиғәтте һаҡлау ведомствоһына хәбәр итергә саҡыра.