Рәсәйҙәрҙең 60 проценты социаль селтәрҙәр менән ҡуллана – һорау алыу

ӨФӨ, 2017 йыл, 25 ғинуар. /«Башинформ» мәғлүмәт агентлығы, Әлим Фәйезов/. Рәсәйҙәрҙең 60 проценты социаль селтәрҙәр менән ҡуллана, тип хәбәр итә «Известия», 2016 йылдың декабрендә бөтә Рәсәй һорау алыу һөҙөмтәһе мәғлүмәттәренә һылтанып. Был 2015 йылға ҡарағанда дүрт процентҡа һәм 2011-селә алынған мәғлүмәттәр менән сағыштырғанда 20 процентҡа күберәк. Социологтар һәр кешенең социаль-демографик портреты барлығын асыҡлаған.

Һорау алынғандар йышыраҡ «Бәйләнештә» (40 процент), «Синыфташтарҙа» (34), Facebook (9), «Минең Донъяла» (7), Twitter (5), «Минең даирәлә» (3), Тере журналда (3) аралашыуын һөйләгән.

«Бәйләнештә» селтәре айырыуса йәштәр араһында популяр – уҡыусыларҙың 80 проценты тиерлек аралашыу өсөн ошо социаль селтәрҙе артығыраҡ күрә. «Синыфташтар» урта йәштәге ҡатын-ҡыҙҙар араһында киң ҡулланыла. Ә бына Facebook һәм Twitter менән йышыраҡ юғары социаль-иҡтисади статусҡа эйә булған, етәкселек вазифаларын башҡарған һәм юғары табышлы, белемле кешеләр файҙалана. Был селтәрҙәрҙә ҡатын-ҡыҙҙарға ҡарағанда күбеһенсә ирҙәр ултыра.

Социаль селтәрҙәрҙең киң таралғанлығы күбеһенсә йәшәү урынына бәйле. Мәҫәлән, мәскәүҙәр араһында ҡулланыусыларҙың һаны иң күбе (49 процент), ә ауыл халҡы араһында – иң түбәне (29 процент).