Башҡортостанда бер нисә бала табырға хәл иткән ғаиләләр һаны арта

ӨФӨ, 2017 йыл, 23 ғинуар. /«Башинформ» мәғлүмәт агентлығы, Гөлфиә Акулова/. Башҡортостанда тағы ла күберәк ғаиләләр бер нисә бала табырға хәл итә, тип хәбәр иттеләр республика буйынса Социаль страховкалау фондынан. Фонд мәғлүмәттәре буйынса, уҙған йылда 52 меңдән ашыу ҡатын-ҡыҙ бала табыу сертификатын алған. Республикала ла, тотош Рәсәйҙәге кеүек үк, малайҙар күберәк тыуған, уларҙың һаны 27 меңдән ашыу, ҡыҙҙар саҡ ҡына әҙерәк – 25,5 мең самаһы. Сабыйҙарҙың уртаса буйы 52,07 сантиметр, уртаса ауырлығы 3,33 килограмм тәшкил итә. Әсәләрҙең уртаса йәше – 29.

2016 йылда «Бала табыу сертификаты» программаһы сиктәрендә Социаль страховкалау фондының төбәк бүлексәһе 565 миллион һум аҡса йүнәлткән. Уларҙың 151 миллион һумдан ашыуын йөклө осорҙа медицина хеҙмәтләндереүе өсөн ҡатын-ҡыҙҙар консультациялары алған. 320 миллион һумдан ашыуы – бала табыу йорттарына, 93 миллиондан күберәге бер йәшкәсә сабыйҙарҙы күҙәтеү хеҙмәттәре өсөн балалар поликлиникаларына йүнәлтелгән.