Төбәктәге Берҡаҙан-Ҡамыш һаҙлығы халыҡ-ара Рамсар биләмәләре статусын алыуы ихтимал

ӨФӨ, 2017 йыл, 18 ғинуар. /«Башинформ» мәғлүмәт агентлығы, Гөлфиә Акулова/. «Асылыкүл» тәбиғәт паркындағы Берҡаҙан-Ҡамыш һаҙлығы әһәмиәтле халыҡ-ара һыу-һаҙлыҡ, йәки Рамсар биләмәләре статусын алыуы ихтимал.

Рамсар конвенцияһы хөкүмәт-ара килешеү булып тора, уның маҡсаты — һыу ҡоштарының йәшәгән урыны булараҡ бөтә һыу-һаҙлыҡ биләмәләрен һаҡлау һәм һөҙөмтәле файҙаланыу. «Рамсар биләмәләре» статусы тәбиғәт ресурстарын һаҡлау һәм файҙаланыу буйынса махсус режим индереүҙе күҙ уңында тота. Рәсәйҙә халыҡ-ара әһәмиәттәге 12 һыу-һаҙлыҡ биләмәһе иҫәпләнә.

Әле Берләшкән Милләттәр Ойошмаһының тирә-яҡ мөхитте һаҡлау буйынса программаһы сиктәрендә Берҡаҙанды икенсе тапҡыр һуғарыу буйынса саралар алып барыла.

«Үҙ ваҡытында Урал алдында 700 гектар майҙанлыҡ, һирәк осраған йәнлектәр һәм ҡоштар йәшәгән иң ҙур һаҙлыҡ киптерелгән, торф сығарылған. Һаҙлыҡты эшкәрткәндән һуң Асылыкүлдәге һыу кимәле кәмене, был да етди проблема булып тора, — тип һөйләне Рәсәй Фәндәр академияһының Өфө биология институты директоры Василий Мартыненко. — Тиҙҙән бында ярҙы нығытыусы дамба төҙөләсәк, махсус ҡойоу механизмы ҡуйыласаҡ. Объект киләһе йылдан эшләй башлай».

«Был Башҡортостанда халыҡ-ара әһәмиәттәге тәүге һыу-һаҙлыҡ биләмәһе буласаҡ. Һис шикһеҙ, төбәктең абруйын арттырасаҡ һәм Берләшкән Милләттәр Ойошмаһының үҫеш программаһы фондтарынан ошо биләмәне тикшереү һәм үҫтереү өсөн аҡса алырға мөмкинлек бирәсәк», — тип хәбәр итте ғалим.