Республиканың ата-әсәләр йәмәғәтселеге «Рособрнадзор» етәксеһенә йомғаҡлау аттестацияһы буйынса һорауҙар бирә ала

ӨФӨ, 2017 йыл, 18 ғинуар. /«Башинформ» мәғлүмәт агентлығы, Эльмира Сабирова/. Башҡортостандың ата-әсәләр йәмәғәтселеге Мәғариф һәм фән өлкәһендә күҙәтеү буйынса федераль хеҙмәт етәксеһенә йомғаҡлау аттестацияһы буйынса һорауҙар бирә ала. Ведомствоның матбуғат хеҙмәте хәбәр итеүенсә, 15 февралдә Сергей Кравцов уҡыусыларҙың ата-әсәләре менән ил кимәлендә осрашыу үткәрә һәм 2017 йылда Берҙәм дәүләт имтиханын, Дәүләт йомғаҡлау аттестацияһын уҙғарыуға бәйле һорауҙарға яуап бирә.

Атап әйткәндә, контроль-үлсәү материалдарының йөкмәткеһе, һаулыҡ мөмкинлектәре сикле мәктәп тамамлаусылар өсөн имтихан үткәреү үҙенсәлектәре, шулай уҡ аттестат алыу һәм юғары уҡыу йорттарына инеү өсөн минималь балдар һаны хаҡында һүҙ барасаҡ.

Мәғариф һәм фән өлкәһендә күҙәтеү буйынса федераль хеҙмәт башлығы менән осрашыу ведомствоның Ситуация-мәғлүмәт үҙәгендә ойошторола.

«Рособрнадзор» хәбәр итеүенсә, әлеге ваҡытта электрон почтаға, Мәғариф һәм фән өлкәһендә күҙәтеү буйынса федераль хеҙмәттең социаль селтәрҙәге төркөмөндә ата-әсәләрҙән һорауҙар ҡабул ителә башлаған да инде.