Башҡортостандың яңы һунарсылыҡ хужалығында маралдар үрсетеләсәк

ӨФӨ, 2017 йыл, 16 ғинуар. /«Башинформ» мәғлүмәт агентлығы, Гөлфиә Акулова/. Башҡортостандың Борай районында «Толпар» һунарсылыҡ хужалығы асылды. Унда маралдар үрсетеү күҙаллана.

Һунар биләмәләренең дөйөм майҙаны 32 гектарҙан ашыу тәшкил итә. Әле бында 150 ҡабан һәм ете ала-сыбар болан аҫрала. Тиҙҙән ике мең баш марал һатып алыу, ете-һигеҙ йыл эсендә уларҙың һанын 15 мең башҡа еткереү ҡарала, тип хәбәр иттеләр республиканың Тәбиғәттән файҙаланыу һәм экология министрлығында. Маралдарҙың нығынып етмәгән мөгөҙҙәре шифалы үҙенсәлектәргә эйә. Һунарсылыҡ хужалығы етәксеһе урынбаҫары Валерий Антипов әйтеүенсә, киләсәктә маралдарҙың мөгөҙҙәрен файҙаланып дауалау буйынса республикала тәүге шифаханаларҙың береһен асырға ниәтләйҙәр.

«Ошо инфраструктура хайуандарҙы һатып алыу, үрсетеү, ҡарау, уларҙы иреккә сығарыу өсөн төҙөлгән, — тине тәбиғәттән файҙаланыу һәм экология министры Илдар Һаҙыев. — Шулай итеп, бөтә һунарсылыҡ ҡеүәтебеҙ тормошҡа ашырыла. Быларҙың барыһы ла һунарсылыҡ туризмын үҫтереү өсөн шарттар булдыра, браконьерҙарға ҡаршы көрәшкә булышлыҡ итә».

Вольерҙар төҙөү — республикала тормошҡа ашырылған һунарсылыҡ хужалығын үҫтереү концепцияһының төп маҡсаттарының береһе. Документ 2030 йылға тиклем иҫәпләнгән. Унда ҡырағай йәнлектәрҙең һанын арттырыу, инвестициялар йәлеп итеп, цивилизациялы һунар ойоштороу мәсьәләһен хәл итеү ҡаралған. Әлеге ваҡытта төбәктә 128 һунарсылыҡ хужалығы бар.