Өфөлә предприятие һәм ойошмалар хеҙмәткәрҙәре өсөн ҡышҡы Корпоратив уйындар ойошторола

ӨФӨ, 2017 йыл, 13 ғинуар. /«Башинформ» мәғлүмәт агентлығы, Гөлфиә Акулова/. Шәмбе, 14 ғинуарҙа, Өфөләге «Ҡашҡаҙан» мәҙәниәт һәм ял паркында V ҡышҡы Корпоратив уйындар уҙғарыла. Йыл һайын ярышта ҡаланың бер нисә тиҫтә предприятие һәм ойошмаһы ҡатнаша. Быйыл сара «Офистан — стартҡа!» девизы аҫтында үтә. Ҡышҡы Корпоратив уйындарҙың маҡсаты — баш ҡала хеҙмәткәрҙәрен физкультура һәм спорт менән даими шөғөлләнеүгә йәлеп итеү.

Ойоштороусылар хәбәр итеүенсә, быйыл бәләкәй (500-гә тиклем кеше) һәм ҙур предприятиелар араһында дөйөм зачет айырым алып барыла. Шулай итеп, хеҙмәткәрҙәр һаны аҙ булған ойошмалар өҫтәмә стимул һәм призлы урындар өсөн көрәшеү мөмкинлеге ала.

Сираттағы ҡышҡы спорт байрамының программаһында быйма кейеп хоккей, ҡарҙа волейбол уйнау, саңғы ярыштары (эстафета), конькиҙа уҙышыу, пейнтбол элементтары менән күңелле старттар ҡаралған.

Төп приз — Өфө хакимиәте башлығы кубогы.