Рөстәм Хәмитов 13-сө ҡала клиник дауаханаһының баш табибын эштән бушатырға күрһәтмә бирҙе

ӨФӨ, 2017 йыл, 12 ғинуар. /«Башинформ» мәғлүмәт агентлығы, Ксения Калинина/. Рөстәм Хәмитов Өфөләге 13-сө ҡала клиник дауаханаһының баш табибын эштән бушатырға күрһәтмә бирҙе. Республика Башлығы Бөрйән районына эш сәфәре барышында Башҡортостан юлдаш телеканалы журналистарына ошо хаҡта һөйләне.

«Беҙ телевидениенан күрһәтелгән сюжетты ҡараныҡ. Тәү сиратта баш табип ғәйепле. Ике йыл буйына лифт эшләмәгән. Шул ваҡыт эсендә ул, төрлө һылтау табып, файҙаланыуға тапшырыу мәсьәләһенән ситкә китте. Мин баш табипты биләгән вазифаһынан бушатырға күрһәтмә бирҙем, — тип белдерҙе Рөстәм Хәмитов. — Был башҡаларға һабаҡ булыр, тип уйлайым. Ошо күренеш — кешеләргә вайымһыҙ мөнәсәбәттең сираттағы миҫалы. Ундайҙарҙы ҡаты язаға тарттырабыҙ. Кәм тигәндә эштән бушатабыҙ».

«Башинформ» агентлығы хәбәр иткәнсә, 10 ғинуарҙа Ферин урамындағы 13-сө ҡала клиник дауаханаһы ҡарамағындағы 1-се поликлиникала бер ҡатын рентген кабинетына баҫҡыстан шыуышып менә. Оло йәштәге ҡатындың ҡыҙы һөйләүенсә, әлеге медицина учреждениеһында рентген кабинеты икенсе ҡатта урынлашҡан. Өҫтәүенә лифт эшләмәй, пандустар һәм коляскалар юҡ.

Башҡортостан буйынса Тәфтиш идаралығы етәксеһе күрһәтмәһе буйынса медицина учреждениеһында күрһәтелгән хеҙмәттәрҙең хәүефһеҙлеген тикшереү ойошторолған.