Бөгөн – Ҡурсаулыҡтар һәм милли парктар көнө

ӨФӨ, 2017 йыл, 11 ғинуар./«Башинформ» мәғлүмәт агентлығы, Гөлфиә Акулова/. Бөгөн, 11 ғинуарҙа, Рәсәйҙә Ҡурсаулыҡтар һәм милли парктар көнө билдәләнә. Ул Кеше аяғы баҫмаған тәбиғәтте һаҡлау үҙәге һәм Бөтә донъя тәбиғәтте һаҡлау фонды башланғысы буйынса 1997 йылдан алып билдәләнә. Уны ойоштороу маҡсаты – Байкалдағы Баргузин кешен һәм башҡа йәнлектәрҙе һаҡлау.

Рәсәйҙә йөҙләгән ҡурсаулыҡ һәм 46 милли парк иҫәпләнә. Махсус һаҡланған тәбиғәт биләмәләре бөтә майҙандың 12 процентын тиерлек биләй. Башҡортостанда бер милли парк («Башҡортостан»), өс федераль ҡурсаулыҡ («Шүлгәнташ», «Көньяҡ Урал» һәм «Башҡорт») иҫәпләнә. «Шүлгәнташ» ҡурсаулығы һәм «Башҡортостан» милли паркы «Башҡорт Уралы» биосфера резерваты составына инә. Биләмә тәбиғи ресурстарға бай, бында 166 мәмерйә иҫәпләнә, Башҡортостан һәм Рәсәй Ҡыҙыл китаптарына ингән үҫемлектәр һәм йәнлектәр бар.