1 ғинуарҙан водителдәргә 30 процент ташлама бирелә

ӨФӨ, 10 ғинуар, 2017 йыл. /«Башинформ» мәғлүмәт агентлығы, Ольга Мортазина/. 2017 йылдың 1 ғинуарынан алып теүәл ике йыл дауамында водителдәр бер төркөм дәүләт хеҙмәтенә – мәҫәлән, водитель таныҡлығы, транспорт сараһы таныҡлығы, паспорты алыуға 30 процент ташламаға эйә булыуы бар. Шарты – хеҙмәткә электрон заказ биреү һәм шул уҡ ысул менән түләү (берҙәм дәүләт хеҙмәттәре порталы йәки ҡулланыусыны берҙәм идентификациялау һәм аутенфикациялау системаһы менә бәйле төбәк порталдары аша). Әҙер документтарҙы Юл хәрәкәте хәүефһеҙлеге дәүләт инспекцияһы бирәсәк.

2017 йылға тиклем автоһәүәҫкәрҙәр ҡайһы бер дәүләт пошлиналарын ташлама менән электрон рәүештә түләй алды, әммә хеҙмәт һөҙөмтәһе лә виртуаль ғына бирелә ине. Шул уҡ ваҡытта, водитель таныҡлығын алмаштырыу хеҙмәте менән файҙаланыу мөмкинлеге булманы, сөнки электрон төрҙә ул юҡ ине.

Хәҙер сикләү бөтөрөлә, документтарҙы теләк буйынса Юл хәрәкәте хәүефһеҙлеге дәүләт инспекцияһында ҡағыҙҙа ла, һанлы форматта ла алырға мөмкин.