Байрамдарҙан һуң тәүге эш көнөн өфөләр туғыҙ баллы тығылыштарҙа ҡаршы алды

ӨФӨ, 2017 йыл, 9 ғинуар. /«Башинформ» мәғлүмәт агентлығы, Ксения Калинина/. Байрамдарҙан һуң тәүге эш көнөн өфөләр туғыҙ баллы тығылыштарҙа ҡаршы алды. 9 ғинуарҙа иртәнсәк төп магистралдәр буйлап юл-транспорт ваҡиғалары һәм таҙартылмаған юлдар арҡаһында ҡалала хәрәкәт ҡыйынлашҡан. Бер төркөм урам буйлап ҡар тауҙары һәм көрттәр өйөлөүе сәбәпле юлда йөрөү өлөшө кәмендә бер һыҙатҡа кәмегән.

«Яндекс.Карталар» сервисы мәғлүмәттәре буйынса юлдарҙа тығылыштар туғыҙ балл менән баһаланған. Өфөнөң айырым райондарында транспорт тиҙлеге сәғәтенә өс-биш саҡрымдан артмаған. Тығылыш Революция, Баҡалы, Октябрҙең 50 йыллығы, Зәки Вәлиди, Октябрь революцияһы, Цюрупа, Киров, Карл Маркс, Әй, Бабушкин, Бессонов, Сипайлово, Комсомол, Шафиев, Менделеев, Степан Кувыкин, Маршал Жуков, Баҡса, Трамвай урамдары, Һәҙиә Дәүләтшина һәм Ибраһимов бульварҙары буйлап күҙәтелгән.