Өфөлә мәктәп уҡыусылары БашДУ менән таныша ала

ӨФӨ, 7 ғинуар, 2017 йыл. /«Башинформ» мәғлүмәт агентлығы, Арина Рәхимҡолова/. Өфөлә ҡышҡы каникулдар осоронда Башҡорт дәүләт университетында «Белем көнө» уҙасаҡ. Юғары уҡыу йорто 9-сы һәм 10 ғинуарҙа уҡыусылар, уларҙың ата-әсәләре һәм уҡытыусылар өсөн үҙ ишектәрен аса.

Өфөнөң Киров районы хакимиәтенең йәмәғәт менән бәйләнеш буйынса бүлегенән хәбәр итеүҙәренсә, был сара «Башкортостан новогодний, удивительный – 2017» проекты сиктәрендә уҙа. «Белем көнө» программаһының төп өлөшө – һөнәр һайлауға булышлыҡ итеүсе экскурсиялар. Мәктәп уҡыусылары һирәк китаптар музейын, Рим Йәнғужин исемендәге этнография музейын, география факультетының геология музейын, геофизика лабораторияһын һәм Физика-техник институтының Дисперсия системаларының микро һәм наномасштаблы динамикалары үҙәген, биология факультетының генетика һәм фундаменталь медицина кафедраһында ПЦР-анализ лабораторияһын ҡарай аласаҡ.

Мәктәп уҡыусылары менән Башҡорт дәүләт университеты факультеттары вәкилдәре осрашасаҡ, улар юғарыу уҡыу йортоноң уҡыу-уҡытыу, ғилми һәм йәмәғәт тормошо тураһындағы бөтә һорауҙарға ла яуап бирәсәк. Башҡорт дәүләт университетында ҡунаҡтарҙы иртәнге 10-дан киске сәғәт 5-кә тиклем көтөп ҡалалар.