Рөстәм Хәмитов Рәсәй Федерацияһы һәм Башҡортостан Республикаһының дәүләт наградаларын тапшырҙы

Өфө, 2016 йыл, 29 декабрь. /«Башинформ» мәғлүмәт агентлығы, Александр Смирнов/. 29 декабрҙә Өфөлә Башҡортостан Башлығы Рөстәм Хәмитов Рәсәй Федерацияһы һәм Башҡортостан Республикаһының дәүләт наградаларын тапшырҙы.

Ордендар, айырма билдәләре, почет грамоталары, маҡтаулы исемдәр һәм рәхмәт хаттары менән 53 сәнәғәт, төҙөлөш, транспорт, торлаҡ-коммуналь һәм урман хужалығы, агросәнәғәт комплексы, дәүләт хеҙмәте, муниципаль идаралыҡ, банк һәм социаль өлкә, эшҡыуарлыҡ һәм сауҙа, фән һәм мәғариф, һаулыҡ һаҡлау, физкультура һәм спорт, матбуғат һәм киң мәғлүмәт саралары, мәҙәниәт һәм сәнғәт хеҙмәткәренең һөнәри ҡаҙаныштары билдәләнде.

Республика Башлығы уларҙы лайыҡлы наградалары һәм яҡынлашып килгән Яңы йыл менән ҡотланы.

- Беҙҙең республика 2017 йылға ышаныслы аяҡ баҫа. Финанс мөмкинлектәребеҙ үҙ өҫтөбеҙгә алған социаль йөкләмәләрҙе атҡарыр өсөн етерлек. Бюджетыбыҙ профицит менән үтәлгән. 2017 йылға күсеүсе бер аҙ ресурстар запасы бар, – тине Рөстәм Хәмитов. – Һеҙҙе, ысынлап хеҙмәт иткән, эшләгән кешеләрҙе күреүе ҙур ҡәнәғәтлек килтерә. Ошондай хеҙмәтсән кешеләрҙең күп булыуын белә тороп республикала ысынлап та бөтәһе лә ышаныслы икәнен, 2017 йылда ла, артабан да яҡшы булыуын аңлайһың.

Сығыштың тулы стенограммаһы һәм наградланыусыларҙың исемлеге республика Башлығының рәсми сайтында баҫылған.