«Дуҫлык» шифаханаһы Рәсәйҙең иң яҡшы һаулыҡ йорто тип танылған

Өфө, 2016 йыл, 27 декабрь. /«Башинформ» мәғлүмәт агентлығы, Галина Бахшиева/. «Тармаҡ лидеры-2016» бөтә Рәсәй милли премияһына йомғаҡ яһалды. «Рәсәйҙең алдынғы һаулыҡ йорттары» номинацияһында Башҡортостандан «Дуҫлык» шифаханаһы еңеүсе тип танылды.

«Дуҫлык» юғары исем алып һәм «Тармаҡ лидеры» билдәһен, логотипын файҙаланыу хоҡуғына эйә булып, Рәсәйҙең иң яҡшы шифаханаһы итеп табылды. Шифаханаға тейешле сертификат тапшырылды, һәм хәҙер ул был Премия лауреаттарының рәсми реестрына индерелде. Награда илебеҙҙәге тармаҡ предприятиелары араһында албирмәҫ позицияларға өлгәшкәне, һөҙөмтәле идара итеүҙе һәм клиенттарға ҡарата яуаплы сәйәсәтте ойоштороуы, шулай уҡ дауалауҙа һәм сәләмәтләндереүҙә инновацион техноголияларҙы оҫта ҡулланыуы өсөн бирелде. Бының хаҡта Башҡортостан Һаулыҡ һаҡлау министрлығының матбуғат хеҙмәтендә хәбәр иттеләр.

Бөтә Рәсәй милли премияһы Дәүләт Думаһы депутаттары һәм төбәк Сауҙа-сәнәғәт палатаһы етәкселәренең туранан-тура булышлығы менән Халыҡ-ара йәмәғәтселек танылыуы академияһы тарафынан булдырылған.