Өфөлә «Әсәлек даны» миҙалы менән бүләкләнгән ҡатын-ҡыҙҙар бала тәрбиәләү серҙәре менән бүлеште

ӨФӨ, 2016 йыл, 15 декабрь. /«Башинформ» мәғлүмәт агентлығы, Гөлфиә Акулова/. 15 декабрҙә Өфөлә, Башҡортостан Хөкүмәте йортонда, биш һәм унан да күберәк бала тәрбиәләгән ҡатын-ҡыҙҙарға «Әсәлек даны» миҙалын тапшырыу тантанаһы булды. 18 йыл эсендә 7,5 меңдән ашыу кеше ошо маҡтау билдәһе менән бүләкләнгән. Бөгөн тағы ла 45 ҡатын-ҡыҙ республиканың хөрмәтле әсәләре исемлеген тулыландырҙы. Миҙалдарҙы һәм аҡсалата премияларҙы вице-премьер Салауат Сәғитов тапшырҙы.

Дәүләкәндән баш ҡалаға бер юлы өс ғаилә усағын һаҡлаусы килгән. 33 йәшлек Татьяна Михайлова тормош иптәше менән алты ҡыҙ тәрбиәләй. Өлкәненә һигеҙ йәш булһа, кесеһе алты айлыҡ ҡына. «Хоҙай күпме биргән, — ти әсә. — Улар бөтөнләй бер-береһенә оҡшамаған. Балаларыбыҙҙы хәстәрлекле булырға, ғәфү итергә, яҡындарын яратырға, тәртипкә өйрәтәбеҙ. Ҙур ғаиләне ҡарау өсөн баҡса үҫтерәбеҙ».

«Йыл аҙағы — һөҙөмтәләрҙе барлау мәле. 2016 йылда уңыштар, юғалтыуҙар, ҡыуаныстар һәм борсолоуҙар ҙа булғандыр. Кемдер сираттағы тапҡыр сабыйының тәүгә тәпәй баҫҡанын күргәндер. «Әсәлек даны» миҙалын ғорур рәүештә тағып йөрөүегеҙҙе теләйем. Киләсәктә балаларығыҙ һеҙҙең хәстәрлекте һәм тырышлыҡты баһалаһын ине. Изгелегегеҙ икеләтә кире ҡайтһын! Яҡынлашып килгән Яңы йыл менән!», — тип мөрәжәғәт итте ҡатын-ҡыҙҙарға Салауат Сәғитов.

Шулай уҡ күп балалы әсәләрҙе бүләкләү барышында «Эшләүсе әсәләр өсөн иң яҡшы предприятие» конкурсы еңеүселәре наградланды.