Приморьела Башҡорт ҡоролтайы ярҙамында төбәк һабантуйы уҙғарыла

ӨФӨ, 2016 йыл, 12 декабрь. /«Башинформ» мәғлүмәт агентлығы, Ғәлиә Нәбиева/. Киләһе йылда Приморье крайында 25-се төбәк һабантуйы ойошторола. Владивостоктың «Дуҫлыҡ» башҡорт-татар йәмәғәт ойошмаһы халыҡ байрамын үткәреү өсөн Приморье крайы хакимиәтенең 300 мең һумлыҡ грантын отто. Һабантуйҙа Сахалин өлкәһе, Камчатка, Хабаровск крайы, Амурҙағы Комсомольск ҡалаһының йәмәғәт ойошмалары вәкилдәре ҡатнаша. Новосибирск башҡорт-татар үҙәге ағзалары ғариза биргән.

Юбилей тантаналарын үткәреүгә әҙерлек барышында Башҡортостанға Владивостоктың «Дуҫлыҡ» башҡорт-татар йәмәғәт ойошмаһы рәйесе Таһир Ибашев килде. «Дуҫлыҡ» юбилей сараһын лайыҡлы билдәләү өсөн Приморьеға профессиональ артистарҙы һәм коллективтарҙы ебәреүҙәрен һорай.

Сығыш яһау өсөн башҡорт милли кейемдәре кәрәк. Ойоштороусылар милли музыка ҡоралдарында уйнау буйынса оҫталыҡ дәрестәре үткәреүҙә лә ярҙам итеүҙе һорай. Башҡортостан артистарын ҡабул итергә һәм уларҙың сығыштарын ойошторорға әҙерҙәр.

Приморье крайында бер нисә башҡорт-татар йәмәғәт ойошмаһы бар. Улар иҫәбендә — «Тыуған ил» (Приморье), «Туған тел» (Находка ҡалаһы), «Тыуған ил» (Уссурийск), «Тыуған дин» (Артём) башҡорт-татар йәмәғәт ойошмалары.