«Башҡортостан» ДТРК-ның радиотапшырыуҙар хеҙмәтен билдәле журналист Ришат Миндияров етәкләне

ӨФӨ, 2016 йыл, 28 ноябрь. /«Башинформ» мәғлүмәт агентлығы, Сергей Захаров/. Билдәле журналист Ришат Миндияров «Башҡортостан» дәүләт телерадиокомпанияһының радиотапшырыуҙар хеҙмәте етәксеһе итеп тәғәйенләнде. Бөтә Рәсәй дәүләт телерадиокомпанияһы филиалының төбәк редакцияһына «Рәсәй Башҡортостан радиоһы», «Хәбәрҙәр FM» һәм «Маяк» радиоһы» ҡарай.

Ришат Миндияров 1991 йылда Башҡорт дәүләт университетының өсөнсө курсында уҡығанда уҡ радиола эшләй башлай. Ул «Радио-2» каналының (хәҙер «Юлдаш» каналы) башланғысында тора, башҡортса тапшырыуҙар алып бара. Төрлө йылдарҙа Башҡортостан юлдаш телеканалының «Сәләм» программаһы авторы һәм алып барыусыһы, башҡорт телендәге мәғлүмәт тапшырыуҙары редакцияһының баш мөхәррире була. Быйыл ғинуар айында «Башҡортостан» ДТРК-на эшкә күсә, «Рәсәй Башҡортостан радиоһы»нда — «Аҙна йомғаҡтары» һәм «Рәсәй 1 Башҡортостан» телеканалында «Хәйерле иртә, республика!» тапшырыуҙарын алып барыусы.

Юғары профессиональ оҫталығы һәм күп йыллыҡ намыҫлы хеҙмәте өсөн Башҡортостан Республикаһының Почет грамотаһы менән бүләкләнгән.

«Яҡын киләсәктә башҡорт телендә ошондай проекттар әҙерләргә ниәтләйбеҙ. Бынан тыш, «Ҡояшлы ҡала» балалар редакцияһына ярҙам итәсәкбеҙ һәм милли тапшырыуҙарҙы үҫтерәсәкбеҙ», — тип билдәләне Ришат Миндияров.