Рөстәм Хәмитов: «2025 йылға торлаҡҡа мохтаждар өсөн сират мәсьәләһен хәл итеүҙе маҡсат итеп ҡуйғанбыҙ»

ӨФӨ, 2016 йыл, 24 ноябрь. /«Башинформ» мәғлүмәт агентлығы, Александр Смирнов/. 24 ноябрҙә Өфөлә Башҡортостан Башлығы Рөстәм Хәмитов республика Хөкүмәтенең ултырышын үткәрҙе. Сара 2025 йылға тиклем Торлаҡ шарттарын яҡшыртыуға мохтаждарҙы торлаҡ биналар менән тәьмин итеү буйынса программаның концепцияһын тикшереүгә арналды.

– Торлаҡ мәсьәләһе күптәр өсөн тәүге урында тора. Был – иң мөһиме, бигерәк тә ҡала халҡы өсөн. Беҙҙә 90 мең самаһы ғаилә иҫәпкә алынған, һәм йыл һайын яҡынса өс проценты ғына торлаҡ шарттарын яҡшырта. Сират кәмемәй, – тине төбәк етәксеһе. – Ошо мәсьәләне хәл итеү өсөн беҙгә башҡаса эшләргә кәрәк. Аҙ тәьмин ителгән граждандар өсөн льготалы кредитлау йәки сығымдарҙың бер өлөшөн ҡаплау сараларын ҡарау зарур. Йәғни хәлде яҡшыртыу йәһәтенән системалы, эҙмә-эҙлекле эшләү мөһим.

Башҡортостан Хөкүмәте Премьер-министры урынбаҫары Владимир Нагорный республика Башлығының башланғысы буйынса әҙерләнгән концепцияның төп идеялары хаҡында һөйләне.

– 2016 йылдың 1 ноябренә 89 меңдән ашыу ғаилә торлаҡ шарттарын яҡшыртыуға сиратта тора. Бының өсөн 4,5 миллион квадрат метр социаль торлаҡ төҙөргә кәрәк, – тине вице-премьер. – Әлеге темптар менән барғанда ошо бурысты үтәү 25 йылға һуҙылыуы ихтимал.

Республика Хөкүмәте эште бер нисә этапта ойошторорға тәҡдим итә. Беренсе этапта (2017-2021 йылдар) – 2,3 миллион квадрат, икенсеһендә (2021-2025 йылдар) тағы ла 2,2 миллион квадрат метр торлаҡ төҙөү ҡаралған. Программаның тәүге этабында граждандарға тәҡдим ителгән ярҙам итеү формаларын республиканың 11 муниципаль берәмегендә: Өфө, Нефтекама, Стәрлетамаҡ, Октябрьский, Бөрө, Салауат, Ишембай, Яңауыл ҡалаларында, шулай у Өфө, Кушнаренко һәм Шишмә райондарында пилот проекттарын тормошҡа ашырғанда ҡулланыу күҙаллана. 2017-2021 йылдарҙа программаның финанс тәьминәтенең дөйөм күләме – 62,5, шул иҫәптән республика ҡаҙнаһы аҡсаһы 17,5 миллиард һум тәшкил итәсәк.

Башҡортостан Башлығы торлаҡ төҙөү өсөн бюджет аҡсаһын һаҡсылыраҡ тотонорға һәм торлаҡ төҙөлөшө өсөн аҡса туплау программаһын әүҙемерәк индерергә саҡырҙы. Ул яңы торлаҡ программалары буйынса халыҡ араһында аңлатыу эштәре алып барырға ҡушты.