Ғәҙәттән тыш хәлдәр министрлығы төбәктә дауыл сығыуы хаҡында иҫкәртә

ӨФӨ, 2016 йыл, 23 ноябрь. /«Башинформ» мәғлүмәт агентлығы, Ксения Калинина/. Ғәҙәттән тыш хәлдәр министрлығы Башҡортостанда дауыл сығыуы хаҡында иҫкәртә. 23 ноябрҙә көндөҙ ҡайһы бер райондарҙа көньяҡ-көнбайыштан иҫкән елдең секундына 15-20 метрға етеүе көтөлә, тип хәбәр итә ведомство, республика гидрометеорология һәм тирә-яҡ мөхит мониторингы идаралығы мәғлүмәттәренә һылтанма яһап.

Ел көсәйгән осраҡта Ғәҙәттән тыш хәлдәр министрлығы биналарҙан сыҡмаҫҡа, ер аҫты үткәүелдәрендә йәки подъездарҙа йәшенергә кәңәш итә. Көслө елдән йорт стеналары янында йәшенергә ярамай, сөнки ҡыйыҡтан шифер һәм башҡа материал киҫәктәренең төшөүе мөмкин. Шулай уҡ электр линиялары, туҡталыштар, реклама таҡталары, төҙөлөп бөтмәгән биналар, ағастар тирәһенән алыҫыраҡ йөрөргә кәрәк. Электр ҡорамалдарының төҙөклөгөн тикшереү зарур.