Төбәктә грипп һәм киҫкен респиратор вирус инфекцияһының эпидемик күтәрелеше ғинуар аҙағында көтөлә

ӨФӨ, 2016 йыл, 22 ноябрь. /«Башинформ» мәғлүмәт агентлығы, Эльмира Сабирова/. Башҡортостанда киҙеү һәм киҫкен респиратор вирус инфекцияһы менән сирләүҙең күтәрелеше ғинуар аҙағында – февраль баштарында көтөлә. Эпидемия 6-8 аҙна дауам итәсәк һәм март аҙағына тамамланасаҡ. Бөгөнгә республикала эпидемик сиктең артыуы теркәлмәгән, тип хәбәр итте «Роспотребнадзор»ҙың Башҡортостан идаралығы начальнигы урынбаҫары Галина Пермина.

«Прививка яһатыу — киҙеүҙе иҫкәртеүҙең иң һөҙөмтәле ысулы. Башҡортостанда вакцинация кампанияһы сентябрь айында уҡ башланды. Кәрәкле күләмдә вакцина килтерелгән. Әлеге ваҡытта халыҡтың 38,5 проценты (1 миллион 756 мең кеше) грипҡа ҡаршы прививка эшләткән. Быйыл республика халҡының 40 процентына прививка яһау бурысы тора. Был кешеләрҙе киҙеүҙән һаҡлаясаҡ», — тине Галина Пермина.

Федераль үҙәктән төбәккә 1 миллион 470 мең доза вакцина килтерелгән, яҡынса 9,5 мең доза — республика ҡаҙнаһы, ҡалғандары предприятие һәм ойошмалар иҫәбенә һатып алынған.

«Роспотребнадзор»ҙың эпидемиологик күҙәтеү бүлеге начальнигы урынбаҫары Зөһрә Шаһиева әйтеүенсә, быйылғы миҙгелдә вирустың А I/Калифорния («сусҡа киҙеүе»), A II/Гонконг һәм B/Бризбон төрҙәре киң тараласаҡ.

Белгестәр алдан прививка эшләтергә кәңәш итә. Вирусҡа ҡаршы иммунитет барлыҡҡа килһен өсөн ваҡыт (ике аҙнанан кәм түгел) талап ителә.

Былтыр 157 мең кеше сирләгән, шулар иҫәбенән 700 пациентҡа киҙеү диагнозы ҡуйылған.