1 ноябрҙән Өфөнөң Салауат Юлаев проспектында яңы тиҙлек сикләүе индерелә – мэрия

ӨФӨ, 2016 йыл, 31 октябрь. /«Башинформ» мәғлүмәт агентлығы, Ғәлиә Нәбиева/. 2016 йылдың 1 ноябрендә киске сәғәт 5-тән Өфөнөң Салауат Юлаев проспектында юл хәрәкәте хәүефһеҙлеген тәьмин итеү һәм юл-транспорт ваҡиғаларын иҫкәртеү маҡсатында тиҙлек режимын сәғәтенә 40 километрға тиклем сикләү индерелә. Ул Сәғит Агиш урамы менән киҫелештән алып Урман техникумы урамы менән киҫелештәге транспорт тоннеленә тиклем һәм кире йүнәлештә ғәмәлдә буласаҡ, тип аңлатма бирҙеләр хакимиәттә.

Шуға бәйле «Максималь тиҙлекте сәғәтенә 40 километрға тиклем сикләү» тигән юл билдәләре ҡуйылған. Сикләү ҡышҡы осорға индерелә. Ҡала хеҙмәттәре һәм Дәүләт автоинспекцияһы водителдәрҙең иғтибарын юл ҡағиҙәләрен үтәү кәрәклегенә йүнәлтә.

Бындай саралар юл-транспорт ваҡиғаларын кәметеүгә булышлыҡ итә. Мәҫәлән, йыл башынан юл-транспорт ваҡиғалары былтырғы менән сағыштырғанда 18 процентҡа кәмегән. Зыян күреүселәр менән юл-транспорт ваҡиғалары – 11 һәм һәләк булыусылар 27 процентҡа аҙыраҡ: быйыл юлдарҙа – 32, былтыр ошо уҡ осорҙа 44 кеше һәләк булған.