Баш ҡалала 50 ҡатын-ҡыҙға «Әсәлек даны» миҙалы тапшырылды

ӨФӨ, 2016 йыл, 21 октябрь. /«Башинформ» мәғлүмәт агентлығы, Ксения Калинина/. 21 октябрҙә Республика Хөкүмәте йортонда күп балалы әсәләрҙе бүләкләү тантанаһы уҙҙы. Республиканың 20-нән ашыу ҡала һәм райондарынан килгән 50 ҡатын-ҡыҙ Башҡортостан Хөкүмәте вице-премьеры Салауат Сәғитов ҡулынан «Әсәлек даны» миҙалдарын алды. Улар араһында хужабикәләр, эшҡыуарҙар, уҡытыусылар, тәрбиәселәр, почтальондар, ауыл эшсәндәре, сауҙа хеҙмәткәрҙәре бар.

Был награда Башҡортостанда 1998 йылдан булдырыла. Ул биш һәм унан күберәк балаға ғүмер бүләк иткән гүзәл заттарға тапшырыла.

«Әсәлек даны» миҙалы — үҙенсәлекле бүләк. Уны алыу өсөн үҙ тармағыңда тырыш, оҫта, талантлы булыуҙан тыш, тәү сиратта оло йөрәкле булыу мөһим. Һеҙ барығыҙ ҙа ошо сифаттарға эйә. 1998 йылдан алып республикабыҙҙа 12 мең ҡатын-ҡыҙ ошо абруйлы награда менән бүләкләнгән. Бөгөндән башлап һеҙ уларҙың рәтендә», — тине Салауат Сәғитов, миҙалдарҙы тапшырып.

Ул ҡатын-ҡыҙҙарға халыҡ шағиры Мостай Кәримдең: «Өс мөғжизә мине әсир итте — Ер, йәнә күк, йәнә ҡатын кеше» тигән шиғыр юлдары менән мөрәжәғәт итте.

Илеш районының Абдулла ауылынан хужабикә Лилиә Рауилова ғүмерен биш бала тәрбиәләүгә арнаған. Өлкән улы 16 йәштә, кесеһенә тиҙҙән ике йәш тула. «Был бүләк — донъябыҙҙа әсәлекте дәүләт кимәлендә таныу ул. Кем бала табырға теләй, кем балаларҙы ярата, уларға кәртәләр юҡ. Әсә булыу — тәбиғәттән бирелгән булмыш ул», — тип тәьҫораттары менән бүлеште Лилиә Рауилова.