Башҡортостанда көслө йәшен булды

ӨФӨ, 2016 йыл, 12 август. /«Башинформ» мәғлүмәт агентлығы, Әлим Фәйезов/. Уҙған төндә Башҡортостанда көслө йәшен йәшнәне. Өфөлә йәшәүселәр билдәләүенсә, ҡалала йәшен быйылғы ҡоро йәй өсөн айырыуса көслө булды. Күк күкрәүҙән машиналарҙың сигнализацияһы эшләп китте, хатта күҙҙәрҙе йомған килеш тә ялағай уйнауын һиҙергә мөмкин ине.

Башҡортостандың гидрометеорология һәм тирә-яҡ мөхит мониторингы идаралығында төндә һәм иртән көньяҡ-көнбайыштан республиканың үҙәк өлөшөнә йылы фронт күсеүен раҫланылар. Өфөлә, Ғафури, Ҡырмыҫҡалы, Кушнаренко, Бөрө, Архангел, Дүртөйлө райондарында йәшен йәшнәгән. Яуым-төшөм бик аҙ, йә иһә бөтөнләй булмаған. Яҡын көндәрҙә тотороҡһоҙ һауа шарттары һаҡлана, урыны менән йәшен йәшнәүе ихтимал, тип билдәләй Башгидромет белгестәре.