Синоптиктар Башҡортостанда һауа торошоноң боҙолоуын фаразлай

ӨФӨ, 2015 йыл, 20 ноябрь. /«Башинформ» мәғлүмәт агентлығы, Гөлфиә Акулова/. 21 ноябрҙән Башҡортостанда һауа торошоноң ҡапыл боҙолоуы көтөлә. Республиканың гидрометеорология һәм тирә-яҡ мөхит мониторингы идаралығы синоптиктары күҙаллауы буйынса, 21 ноябрҙә ҡар яуасаҡ, ел көсәйгәндә секундына 17-22 метр тиҙлектә иҫәсәк. Юлдарҙа — ҡар һырынтылары, күреүсәнлек 500-1000 метрға тиклем насарая. Һауа температураһы төндә 9-14, көньяҡ-көнсығышта 18-23 градус һыуыҡ, көндөҙ 1-6, көньяҡ-көнсығышта 11 градусҡаса һалҡын.

22 ноябрҙән 24-нә тиклем төбәктә епшек ҡар, урыны менән боҙло ямғыр яуыуы көтөлә. Юлдарҙа боҙлауыҡ булыуы, электр сымдарына, ағастарға епшек ҡар йәбешеүе ихтимал. Осор һуңында көндөҙ 0-5 градус йылы, ҡарҙың иреүе күҙаллана.

Өфөнөң «112-се ҡотҡарыу хеҙмәте» урамдарҙа электр тапшырғыс линиялары, ағастар, реклама таҡталары эргәһендә, автомобиль юлдарын үткән саҡта һаҡ булырға саҡыра. Водителдәргә иһә тиҙлек режимын һаҡлау мөһим. Автомобилдәрҙе ағастар янына ҡуйырға кәңәш ителмәй.