Башҡортостан һәм Өфө яңылыҡтары
92.26
-0.33
99.71
-0.56
86.97
-0.03
-3 °C
Болотло
Бөтә яңылыҡтар
Йәмғиәт
13 Ноябрь 2013, 12:12

Башҡортостанда Президент шыршыһы 23 декабрҙә Йәштәр һарайында үткәрелә

Олег Яровиков
Олег Яровиков
Башҡортостан президенты Рөстәм Хәмитов «Башҡортостан Республикаһында Яңы 2014 йылды байрам итеү тураһында» Указға ҡул ҡуйҙы, тип хәбәр иттеләр төбәк башлығы матбуғат хеҙмәтендә. Документҡа ярашлы, Республика ойоштороу комитеты составы раҫланды. Район һәм ҡала хакимиәттәре, профсоюз һәм башҡа йәмәғәт берләшмәләре менән берлектә ойоштороу комитетына мәғариф һәм мәҙәниәт учреждениеларында, ҡала һәм ауылдарҙа Яңы йылды байрам итеүгә арналған саралар әҙерләп үткәреүҙе тәьмин итергә ҡушылды.
Указға ярашлы, 23 декабрҙә Башҡорт дәүләт аграр университетының Йәштәр һарайында Президент Яңы йыл шыршы байрамы үткәреләсәк. Башҡортостан ҡалаларынан һәм райондарынан байрамға дөйөм белем биреү учреждениеларының уҡыу алдынғылары, предмет олимпиадаларында һәм спорт ярыштарында еңеүселәр, художестволы үҙешмәкәрлек фестивалдәре лауреаттары, хәрби бурысын үтәгәндә һәләк булған хәрби хеҙмәткәрҙәр һәм эске эштәр органдары хеҙмәткәрҙәре балалары, шулай уҡ күп балалы аҙ тәьмин ителгән ғаиләләрҙән балалар иҫәбенән уҡыусылар саҡырыласаҡ .
Ойоштороу комитетына күп балалар ҡатнашлығында Яңы йыл сараларын үткәргәндә йәмәғәт тәртибен һаҡлауҙы, янғын хәүефһеҙлеген, медицина персоналының дежур итеүен, шулай уҡ ойошҡан рәүештә балаларҙы килтергәндә именлекте тәьмин итергә ҡушылды.
Киң мәғлүмәт сараларында байрам сараларын киң яҡтыртыу ойоштороласаҡ, Яңы йыл байрамдары һәм мәктәп каникулдары ваҡытында балалар өсөн мәҡәләләр һәм тапшырыуҙар циклы әҙерләнәсәк.
Республиканың Финанс министрлығына Президент Яңы йыл шыршыһын әҙерләү һәм үткәреү, унда ҡатнашыусыларҙың «Салют» санаторийында өс көнлөк ялын ойоштороу буйынса сараларҙы, биш һәм унан күберәк бала тәрбиәләгән ғаиләләрҙән 14 йәшкә тиклемге балаларға Президент Яңы йыл бүләктәре һатып алыу менән бәйле сығымдарҙы финанслауҙы тәьмин итергә йөкмәтелде. Шулай уҡ һөнәри белем биреү ойошмаларында уҡыған етем һәм ата-әсә ҡарауынан мәхрүм ҡалған балаларға матди ярҙам күрһәтергә ҡушылды.
Район һәм ҡала хакимиәттәренә үҙҙәренең һәм йәлеп ителгән средстволар иҫәбенә инвалид балаларға, балалар йорттарында, социаль приюттарҙа һәм интернаттарҙа тәрбиәләнгән етем һәм ата-әсә ҡарауынан мәхрүм ҡалған балаларға яңы йыл бүләктәре тапшырыуҙы тәьмин итергә тәҡдим ителде.
Автор:«Башинформ»
Читайте нас: