Өфөлә лицензияһы булған һигеҙ шәхси бала баҡсаһы эшләй

Өфөлә белем биреү хеҙмәттәрен күрһәтеүгә дәүләт лицензияһы булған һигеҙ шәхси бала баҡсаһы эшләй, тип хәбәр иттеләр ҡала хакимиәтенән. Шәхси бала баҡсалары селтәре йылдан-йыл үҫешә. 57 эшҡыуар бала ҡарау, тәбиәләү һәм үҫтереү буйынса хеҙмәттәр күрһәтә.

Муниципалитеттар уларға һәр яҡлап ярҙам күрһәтә. 2012 йылда дәүләткә ҡарамаған мәктәпкәсә белем биреү учреждениеларына 2,1 миллион һумдан ашыу суммаға субсидия түләнгән. Бюджет средстволары педагогик хеҙмәткәрҙәргә эш хаҡын түләүгә, уҡытыу-күргәҙмә әсбаптар, зиһенде үҫтереүсе уйындар һатып алыуға йүнәлтелә.

2013 йылдың ғинуарында ҡала хакимиәте шәхси бала баҡсалары директорҙары менән осрашты, сара сиктәрендә көнүҙәк мәсьәләләр һәм уларҙы хәл иеү юлдары, шулай уҡ бындай бала баҡсалары селтәрен үҫтереү мөмкинлектәре тикшереле.

15 февралдә Ирек Ялалов Гагарин урамында урынлашҡан шәхси бала баҡсаһында булды. «Вариҫ» мәктәпкәсә белем биреү үҙәге «Көнсығыш клубы» ғаилә реабилитациялау һәм үҫтереү үҙәгенә ҡарай. Шәхси бала баҡсаһы ике йылдан ашыу эшләй, уның программалары бөтә ғаилә ағзалары өсөн иҫәпләнгән.

Бөгөнгө көндә бында 15 балаға иҫәпләнгән дүрт төркөм эшләй. Сабыйҙарҙың һәләтен үҫтереү өсөн БР Мәғарифты үҫтереү институты менән раҫланған дәрестәр программаһы әҙерләнгән. Балалар өсөн заманса һәм көнсығыш бейеүҙәре, художестволы гимнастика, айкидо, ушу, вин-чун кунг-фу, сәләмәтләндереү фитнесы буйынса дәрестәр ҡаралған. Бала баҡсаһында тәрбиәләнеүселәр менән 30-ҙан ашыу хеҙмәткәр эшләй, уларҙың 60 проценты юғары категорияға эйә.

Үҙәктең үҙенсәлеге шунда: һәр ата-әсә, ҡайҙа булыуына ҡарамаҫтан, интернет аша балаһын күҙәтә ала.