Башҡортостан солистары II Халыҡ-ара төрки телле илдәрҙең этно-эстрада музыкаһы конкурсында ҡатнашты

19-23 майҙа Төркиәнең Силифке ҡалаһында 39-сы Халыҡ-ара мәҙәниәт аҙналығы сиктәрендә ТӨРКСОЙ ярҙамында II Халыҡ-ара төрки телле илдәрҙең этно-эстрада музыкаһы конкурсы үтте, унда Башҡортостан солистары Айҙар Хәмзин, Ләйсән Моталлапова, Әлфиә Беслер һәм Сәриә Вәлиева ҡатнашты. Конкурста шулай уҡ Әзербайжан, Ҡаҙағстан, Ҡырғыҙстан, Үзбәкстан, Хакасия, Татарстан, Тыва, Ҡырым (Украина) вокалсылары үҙ оҫталыҡтарын күрһәтте.

Башҡортостандың ТӨРКСОЙ-ҙағы вәкиле Әхәт Сәлихов хәбәр итеүенсә, башҡорт композиторы, музыкант, Рәсәй Федерацияһының һәм Башҡортостан Республикаһының атҡаҙанған сәнғәт эшмәкәре, Ғ.Сәләм һәм Ф.Кәрим исемендәге премиялар лауреаты, Башҡортостан Республикаһының Музыка йәмғиәте президиумы рәйесе, БР Композиторҙар союзы идараһы ағзаһы Нур Даутов, төрлө илдәрҙең билдәле артистары һәм композиторҙары менән бер рәттән, халыҡ-ара конкурстың жюри ағзаһы булған.