Рима Баталова Дәүләт Думаһы комитеты бүлегенең рәйесе итеп тәғәйенләнде

Дәүләт Думаһының Физик культура, спорт һәм йәштәр эштәре буйынса комитеты ултырышында уның яңы структураһы раҫланды.

Депутаттар ҡарарына ярашлы, Комитет составында паралимпия спорты, инвалидтар һәм һаулыҡ мөмкинлеге сикләнгән кешеләр спорты мәсьәләләре менән спорт һәм Олипия хәрәкәтен үҫтереү өлкәһендә халыҡ-ара хеҙмәттәшлекте үҫтереү мәсьәләләре буйынса ике комитет бүлеге эшләйәсәк.

Комитет ағзалары паралимпия спорты, физик культура һәм инвалидтар, һаулыҡ мөмкинлеге сикләнгән шәхестәр спорты мәсьәләләре буйынса комитет бүлеге рәйесенә тәҡдим ителгән Рима Баталованың кандидатураһын бер тауыштан хупланы. Бындай хөрмәткә яҡташыбыҙ паралимпия хәрәкәте үҫешенә ҙур өлөш индергәне өсөн лайыҡ булған.

Рима Аҡбирҙе ҡыҙы фекеренсә, «паралимпия спортын үҫтереү мәсьәләләре буйынса профилле бүлек булдырыу, беренсенән, был йүнәлештәге мәсьәләләрҙе алдан уҡ тикшереп, уларҙы профилле Комитетҡа ҡарауға индерергә, икенсенән, эксперт-консультатив совет ойошторорға мөмкинлек бирәсәк, ошо совет сиктәрендә закон сығарыу буйынса башланғыстарҙың барыһы ла ғалимдар һәм инвалидтарҙың йәмәғәт ойошмалары вәкилдәре ҡатнашлығында йәмәғәт тыңлауҙарында ҡараласаҡ».