Бөгөнгө көндә 47 мең кеше хеҙмәт ветераны исемен алырға теләй

«Оҙайлы эш стажына эйә хеҙмәт ветераны» исемен алыу өсөн республиканың социаль яҡлау органдарына бөгөнгө көндә Башҡортостандың 47 мең кешеһе мөрәжәғәт иткән, тип хәбәр итте «Башинформ» агентлығына БР Хеҙмәт һәм халыҡты социаль яҡлау министрлығының матбуғат секретары Эльмира Кожаева.

Хәтерегеҙгә төшөрәйек, 2012 йылдың 1 ғинуарында «Оҙайлы эш стажына эйә хеҙмәт ветераны» исемен биреү өлөшөндә «Һуғыш, хеҙмәт һәм Ҡораллы көстәр ветерандары тураһында»ғы Башҡортостан Республикаһы Законы үҙ көсөнә инде. Пенсия йәшенә (ир-егеттәр — 60 йәшкә, ҡатын-ҡыҙҙар — 55 йәшкә) етеп, хеҙмәт стажы 40 һәм 35 йылға тулһа, «Оҙайлы эш стажына эйә хеҙмәт ветераны» исемен алыу өсөн йәшәү урыны буйынса Хеҙмәт һәм халыҡты социаль яҡлау идаралығына мөрәжәғәт итергә мөмкин.

БР Хеҙмәт һәм халыҡты социаль яҡлау министрлығы был мәсьәлә буйынса килеп тыуған хәлдәргә мониторинг үткәрә.