Бөйөк Ватан һуғышы ветераны БР Президенты Рөстәм Хәмитов менән хоккей уйынын ҡараны

Башҡортостан Республикаһы Президенты Рөстәм Хәмитов кисә Өфөнөң «Салауат Юлаев» командаһы менән Магнитогорск «Металлург»ының боҙҙағы алышын ҡараны. Уның менән бергә мауыҡтырғыс уйынды үҙенсәлекле ҡунаҡ – Бөйөк Ватан һуғышы ветераны Төхвәтулла Әхмәтйәнов күҙәтте.

Эш шунда, матчтан бер көн алда Рөстәм Хәмитовтың блогында ҡартатаһының боҙ аренаһына барырға теләүе хаҡында уның ейәне Артур яҙа:

— Ҡартатайым инвалид һәм Бөйөк Ватан һуғышы ветераны. Ул «Салауат Юлаев» командаһы ҡатнашлығындағы хоккей уйындарын ҡарарға ярата. Әммә ғүмерендә бер тапҡыр булһа ла хоккейҙың үҙенә эләгергә теләй. Ул «Уфа-Арена» кассаларында нисек билет һатып алалар, ветерандар өсөн ташламалар бармы-юҡмы икәнлеген белешеүемде һораны. Үкенескә күрә, «Уфа-Арена» администраторы миңә Бөйөк Ватан һуғышы ветерандары өсөн ташламалар ҡаралмауы хаҡында әйтте. 90-сы йылдарҙа ветерандарға ла, пенсионерҙарға ла, студенттарға ла льготалар булған, – тип билдәләй ветерандың ейәне.

Һәм икенсе көнөнә үк Төхвәтулла Әхмәтйәновты төбәк башлығы уйынға саҡырҙы.

Президент Төхвәтулла Ниғмәт улына «Салауат Юлаев»тың көйәрмәндәр шарфын һәм өфөләрҙең йондоҙо Александр Радуловтың сәкәнен бүләк итте.