Өфөлө канализация люктары менән мауыҡҡан

Баш ҡаланың Орджоникидзе районынан бер ҡайҙа ла эшләмәгән 30 йәшлек ир-егет үҙенсәлекле алым менән йәшәүгә аҡса тапҡан. Август дауамында ул канализация люктарының ҡапҡасын урлап көн иткән. Был кәсебенә ир, ғәҙәттә, тәүлектең ҡараңғы ваҡытында сыҡҡан. ВАЗ-дың «Лада»һында ул кәрәкле канализация ҡоҙоғо янында туҡтап, меттал ҡапҡасты машинаһына тейәгәс, металл ҡабул итеү пунктына ашыҡҡан. Бер айҙа ул 20-нән ашыу канализация ҡапҡасын урлаған. Һәр трофей 200-ҙән 250 һумға тиклем тартҡан. Һуңынан енәйәтсе көндөҙ ҙә урлай башлай. Был һаҡһыҙлығы тиҙҙән һөҙөмтәһен бирә: осраҡлы шаһит машинаның номерын хәтерҙә ҡалдыра һәм сәйер водитель тураһында милицияға хәбәр итә. Участковыйҙар люктарға битараф булмаған ҡараҡты үҙенең фатирында ҡулға ала. Әлеге ваҡытта шик аҫтында булған был ир-егет ҡаланан ситкә сыҡмау тураһында ҡағыҙға ҡул ҡуйған, уға ҡарата “Урлашыу” статьяһы буйынса енәйәт эше асылған, тип хәбәр итә БР буйынса Эске эштәр министрлығының матбуғат хеҙмәте.