Мәктәптәрҙең янғынға ҡаршы хәүефһеҙлеге – Өфө властарының иғтибар үҙәгендә

Бөгөн Өфө хакимиәтендәге кәңәшмәлә ҡала мәктәптәренең янғынға ҡаршы хәүефһеҙлеге мәсьәләһе күтәрелде. Хакимиәт башлығы Павел Качкаев хәбәр итеүенсә, автоматлаштырылған янғын һүдереү системалары ҡаланың 371 белем биреү учреждениеһында ҡуйылған.

— Был системаларҙы хеҙмәтләндереү артыҡ ҡиммәт тә түгел – айына уртаса өс мең һум самаһы, — тине ул. – Шуға ҡарамаҫтан, 72 мәктәп һәм балалар баҡсаһында был системаларҙы хеҙмәтләндереүгә килешеүҙәр әле булһа төҙөлмәгән.

Өфөнөң күп белем биреү учреждениелары янғынға ҡаршы һыу менән тәьмин итеү йәһәтенән яҡшыртыуҙы талап итә. Мәҫәлән, үткәрелгән тикшереүҙәр барышында ҡаланың 23 мәктәбендә уның төҙөк булмауы асыҡланды. Был күрһәткес буйынса Калинин районы “алда”, унда һигеҙ мәктәптә янғынға ҡаршы һыу менән тәьмин итеү системаһы төҙөк түгел. Иң имен хәл – Ленин районында, тикшереү барышында уның белем биреү учреждениеларына бөтөнләй дәғүә белдерелмәне.