Өфөлә Перфильев иҫтәлегенә теннис турниры башланды

«Нефтсе» стадионының асыҡ корттарында Алексей Перфильев иҫтәлегенә бөтә Рәсәй теннис турниры старт алды. Бынан тыш, ярыш сиктәрендә Республика баш ҡалаһы Кубогы уйнатыла. Кортҡа өс йәш төркөмөндәге спортсылар сыға: 9-10 йәштәгеләр, 14 һәм унан йәшерәктәр, ололар. Турнир һигеҙенсе тапҡыр үткәрелә, һәм йыл һайын ҡатнашырға теләүселәр арта. Бөгөн Өфөнән, Стәрлетамаҡтан, Нижневартовскиҙан, Пенза, Екатеринбург һәм илебеҙҙең башҡа ҡалаларынан 150 тенниссы еңеү өсөн алышҡа сыҡҡан.

— Теннисылар өсөн беҙҙең турнир ҙур әһәмиәткә эйә, – тип билдәләй ярыштарҙың баш судьяһы Илдар Иҫәнтәев. – Йәштәр тәжрибә туплай. Турнирҙың рейтинглы булыуына күрә, үҙенең активына мәрәйҙәр йыя, был карьера өсөн мөһим. Бынан тыш, еңеүселәр приздар һәм бүләктәр ала.

Турнир биш көн дауам итә, финал уйындары 3, 4 июндә үтәсәк.