Емеш-еләк ағастарының нисек һаҡланыуы тикшерелә

Республиканың агрономия хеҙмәттәре емеш-еләк ағастарының нисек һаҡланыуын өйрәнә.

Декабрь уртаһынан алып республикала һыуыҡ һауа торошо һаҡлана. Уҙған ҡыштарҙа емеш-еләк ағастары артыҡ зыян күрмәгәйне. Быйыл да Ауыл хужалығы министрлығы белгестәре ағастар ҡышты уңышлы үткәрер тип ышана. Агрономдар әле ҡыуаҡлыҡтарҙың нисек һаҡланыуын асыҡлау өсөн ҡырҡып алынған ботаҡтарҙы үҫтереп ҡарай. Эксперимент һөҙөмтәләре февраль башында билдәле буласаҡ.

Бөгөн Башҡортостанда был өлкәлә алты емеш-еләк совхозы һәм ике крәҫтиән-фермер хужалығы эшләй. Улар барыһы ла рентабелле. Баҡса культураларының дөйөм майҙаны – 450 гектар тирәһе. Алмағастарҙың иң ҙур плантациялары – Шишмә емеш-еләк совхозында һәм “Ҡояшлы Боҙаяҙ”ҙа. Республиканың емеш-еләк хужалыҡтары ҡарағат, ер еләге, сейә, ҡурай еләге, груша, һырғанаҡ һәм башҡа культуралар үҫтерә. Витаминлы продукция кондитер һәм консерва предприятиеларына һатыла. Бынан тыш, йыл һайын халыҡҡа емеш йыйыу ойошторола.

Яҙын һәм көҙөн емеш-еләк совхоздары районлаштырылған үҫентеләрҙе һата.