Минзәлә башҡорттары тураһында яңы китап сыҡты

Зәйнәб Биишева исемендәге Башҡорт “Китап” нәшриәтендә тарихсы Әнүәр Әсфәндиәровтың “Минзәлә башҡорттары ауылдары” исемле китабы баҫылып сыҡты. Күләмле монография билдәле тарихсының һуңғы йылдарҙағы эшмәкәрлегенә йомғаҡ яһай һәм китап һөйөүселәрҙе 1920 йылға тиклем Рәсәйҙең дүрт өйәҙе һаналған Минзәлә, Бөгөлмә, Йылабуға һәм Сарапулдағы башҡорт ауылдарының ҡыҫҡаса тарихы менән таныштыра. Билдәле булыуынса, Минзәлә өйәҙе революцияға тиклем оҙаҡ йылдар Өфө губернияһы составында булған.

Авторҙың башҡорттарға аҫаба ерҙәрен биләүгә юридик нигеҙ булған рус батшалары биргән хоҡуҡ һәм һаҡлау грамоталарының тексын килтереүе китаптың төп үҙенсәлеге булып тора. Унда шулай уҡ торама пункттар, уларҙың барлыҡҡа килеү ваҡыты һәм этник составы, нигеҙ һалыусылары һәм йәшәгән халҡы, хужалыҡ тураһында ентекле мәғлүмәт бирелгән. Китаптың тиражы 3000 экземпляр.