Балаларҙы сәләмәтләндереүгә бүленгән средстволар күләме буйынса Башҡортостан алда бара

Балаларҙы сәләмәтләндереүгә йүнәлтелгән средстволар күләме буйынса Башҡортостан Рәсәй Федерацияһы субъекттары араһында 6-сы урынды биләй. Социаль страховкалау фондының БР буйынса төбәк бүлексәһендә хәбәр итеүҙәренсә, быйыл, элекке йылдарҙағы кеүек, балалар санаторийҙары һәм йыл әйләнәһенә эшләүсе санатор-сәләмәтләндереү лагерҙары айырыуса ҙур популярлыҡ менән файҙаланды. РФ Социаль страховкалау фондының эҙләү-мониторинг системаһының 1 декабргә мәғлүмәттәренә ҡарағанда, уларҙа 19,6 меңдән ашыу бала ял итте һәм сәләмәтлеген нығытты. Тағы 39,1 мең бала – ҡаланан ситтәге лагерҙарҙа һәм 107,7 мең бала көндөҙгө үҙәктәрҙә ял итте.

Әгәр 2009 йылға балаларҙың ялын һәм сәләмәтләндереүҙе ойоштороуға төбәк бүлексәһенә 602,7 миллион һум күләмендә аҡса бүленһә, 1 декабргә ҡарата мәғлүмәттәр буйынса уларҙың 578 миллион һумы үҙләштерелгән дә инде.